نهاية تحدي الـ29 يوم

الصورة هو حلمي ان اعمل في كوكل حققته بفضل الفوتوشوب

 أن تضع نفسك وبأرادتك تحت الضغط (deadline) وتكون على علم بعد أنجاز الخطة ضمن الايام الموضوعة وتحصل على جائزة هو اجمل شعور او هو السعادة بحد ذاتها ها نحن الأن نصل الى نهاية التحدي الذي وضعه مرتضى التميمي وجعلنا نعيش فرصة تحتقيق الاهداف وكذلك التعرف على مجموعة 

من الشباب الطموح الذي ادهشني برغم صغره والاختلافات في مستوى التحدي الا انني استمتعت بما شاهدته من انجازات 

وهمم عالية من هؤلاء الابطال .

    التحدي الذي اتخذته هو برمجي بامتياز في البداية كانت الحماسة عالية جدا ولكن من الطبيعة البشرية سرعان ما يدخل عنصر الروتين وعليك تلافي هذا العنصر قدر الامكان أدخلت الكثير من ألتحديات ألثانوية التي على طول ألتحدي كنت أنشر بعض المدونات لايضاح نسب ألتقدم فيها وجدت ان ألتحدي يجب أن يطغي على جميع ألجوانب بشكل أيجابي فكان ادخال التمارين البدنية له حصة من التحدي

وهسة كافي كتابة بالفصحى نحـــــــــــــــجي عراقي بحت

أول عشر ايام

 البرمجة / تعلمت هواي كورسات لبناء المواقع بالبداية تعلمت 

HTML &CSS & JAVASCRIPT

وهذا الكورس  الي تعلمت منة كل الاساسيات 

وهمين تعلمت الكتابة السريعة على الكيبورد من هذا الموقع https://www.typingclub.com/sportal/ 

اللغة الانكليزية / هم جان الها حظ بهذا التحدي ادربت على تطبيق دولينجوو

التمارين الرياضية / كدرت اسوي 15 عدة من تمارين الضغط

ثاني عشر ايام

البرمجة / كلت لازم انتج شي يفيد الناس لذلك اكتشفت لازم اتعلم اكتب كود مرتب ونظيف وهذا تم من تعلمت  React

بعدين واجهتني مشكلة رفع الصفحات الي ابرمجها اتضح لازم اتعلم   github

بهذي العشرة الثانية شوية حسيت تراجع بأداء الخطة وجان انقطاع الكهرباء سبب جبير لذلك اتخذت من التحدي حافز ثاني وهو ان اسوي مقابلات عمل هواية صح ما حصلت شغل بس فادتني على الصعيد الشخصي وهمين اشتركت بمؤتمر تطوعي وطلبو مني تصميم مقدمة على الافترايفيكت لذلك خلال 20 ساعة تعلمت هذا البرنامج وأنتجت هذا العمل وعجبهم كلش شوفو

الرياضة / بهذي العشر ايام دخلت بالتحدي البايسكل بحيث مشيت 20 كيلو 

ثالث عشر ايام

هنا بدة الرتم يصعد وصار لازم أنتج شي بالبرمجة 

لذلك اطلقت موقعي الشخصي

موقع لمعرفة الطقس

موقع لمتابعة المهام 

وكذلك بديت انشر اكواد على الكيت حتى تسهل على مبرمجين المواقع استخدامهم بالتصميم وتكدرون تحصلوها من الكيت هاب مالتي 

الانكليزي / شفت موقع كلش حلو  اتعلم منة اساسيات اللغة learnenglish

من الامور الجنت حاب اتحدى نفسي بيها بس ما توفقت أو أستحيت اسويها هو أن ابيع طيارات ورقية قريب من مدينة الالعاب في بغداد لكن للاسف بسبب الخجل والحرارة العالية بالجو ماتوفقت انفذ هل شي

سعيد لاني شاركت بهذا التحدي وعرفت شلون اتحدى نفسي واطلع افضل ما بيها قدر الامكان راح استمر على هذا النهج بين فترة والثانية اتحدى نفسي بشكل اكبر 

شكراً مرتضى ولجميع الاصدقاء الي تعرفت عليهم خلال الــ29 يوم

تحياتي

حيدر النقاش